୨୮ ଅକ୍ଟୋବର ୨୦୧୭ ସୁଦ୍ଧା ମୋଟ ୧୦୫୨ ରକ୍ତଦାନ ଶିବିରରୁ ୫୦୮୭୮ ୟୁନିଟ୍ ରକ୍ତ ସଂଗୃହୀତ। ରକ୍ତଦାନ କ୍ଷେତ୍ରରେ ଆମ ଓଡ଼ିଶା ରାଜ୍ୟର ଅଗ୍ରଣୀ ସ୍ବେଚ୍ଛାସେବୀ ଅନୁଷ୍ଠାନ ଭାବେ ରାଜ୍ୟ ସରକାରଙ୍କ ଠାରୁ ଲଗାତାର ୧୧ ଥର ପୁରସ୍କୃତ। ସମସ୍ତ ରକ୍ତଦାତାଙ୍କୁ ଅଭିନନ୍ଦନ।

Back

   
‘ଆମ ଓଡ଼ିଶା’ ପକ୍ଷରୁ ପୁସ୍ତକ ଉନ୍ମୋଚନ ଉତ୍ସବ : ‘ଶିଶୁ ସାହିତ୍ୟ ପାଇଁ ଆନ୍ଦୋଳନ ଆବଶ୍ୟକ’
ଭୁବନେଶ୍ବର, ୩/୮(ଇମିସ): ବିଶିଷ୍ଟ ଶିଶୁ ସାହିତ୍ୟିକ ଦାଶ ବେନହୁରଙ୍କୁ ଆଜି ୬୦ ପୂରିଛି୤ ଏହି ଉପଲକ୍ଷେ ‘ଆମ ଓଡ଼ିଶା’ ପକ୍ଷରୁ ରେଡ଼କ୍ରସ୍ ଭବନରେ ଏକ ସମ୍ବର୍ଧନା ଉତ୍ସବର ଆୟୋଜନ କରାଯାଇଥିଲା୤ ଏଥିରେ ତାଙ୍କ ଦ୍ବାରା ଲିଖିତ ୩ଟି ପୁସ୍ତକ ‘ହୁଳୁହୁଳୁ ଅସୁର ଓ ଅନ୍ୟାନ୍ୟ କାହାଣୀ’, ‘ଦି ପୁଡ଼ୁଗା କିଙ୍ଗ୍ ଏଣ୍ଡ ଅଦର ଷ୍ଟୋରିଜ୍’ ଓ ‘ପିଲାଙ୍କ ଗପ ବହି’ର ଉନ୍ମୋଚନ ହୋଇଥିଲା୤ ବିଶିଷ୍ଟ କବି ପଦ୍ମ ବିଭୂଷଣ ସୀତାକାନ୍ତ ମହାପାତ୍ର ଏ ସବୁର ଉନ୍ମୋଚନ କରିଥିଲେ୤ ଶ୍ରୀ ମହାପାତ୍ର କହିଲେ, ଆଜିର ସମୟରେ ପିଲାମାନଙ୍କୁ ଗପ କହିବାକୁ କେହି ନାହାଁନ୍ତି୤ ବାପା ମା’ଙ୍କ ପାଖରେ ସମୟ ନ ଥିଲା ବେଳେ ନ୍ୟୁକ୍ଳିୟର୍ ଫ୍ୟାମିଲି ହେତୁ ପିଲାମାନେ ଏକୁଟିଆ ହୋଇଯାଉଛନ୍ତି୤ ସେମାନଙ୍କ ପାଇଁ ପଠନ ଉପଯୋଗୀ କୌଣସି ପୁସ୍ତକ ନାହିଁ୤ ରାଜ୍ୟର ଲବ୍ଧ ପ୍ରତିଷ୍ଠିତ ସାହିତ୍ୟିକମାନେ ମଧ୍ୟ ଶିଶୁ ସାହିତ୍ୟ ରଚନା କରିବାରେ କୌଣସି ଆଗ୍ରହ ପ୍ରକାଶ କରୁନାହାଁନ୍ତି୤ ଏଭଳି ଘଡ଼ିସନ୍ଧି ମୁହୂର୍ତ୍ତରେ ଦାଶ ବେନହୁର ଶିଶୁ ସାହିତ୍ୟକୁ ବଞ୍ଚାଇ ରଖିବାକୁ ଉଦ୍ୟମ କରିଛନ୍ତି୤ ଯାହାକି ପ୍ରଶଂସନୀୟ କାର୍ଯ୍ୟ ବୋଲି ଶ୍ରୀ ମହାପାତ୍ର କହିଥିଲେ୤ ପିଲାମାନଙ୍କ ମନସ୍ତତ୍ତ୍ବକୁ ବୁଝି ସେମାନଙ୍କ ମନରେ କୌତୁହଳ ହେବା ଭଳି ଲେଖା ପ୍ରକାଶ କରାଗଲେ ତାହା ଆଦରଣୀୟ ହୋଇପାରିବ୤ ଯଦି ଫକୀର ମୋହନ ସେନାପତିଙ୍କ ଭଳି କାଳଜୟୀ ଉପନ୍ୟାସକୁ ପିଲାମାନଙ୍କ ପଠନ ଉପଯୋଗୀ ଢଙ୍ଗରେ ସାହିତ୍ୟକୁ ରାଜ୍ୟ ତଥା ଦେଶ ବାହାରେ ପ୍ରକାଶ କରିବାକୁ ହେଲେ ଇଂରାଜୀ ହିଁ ଏକମାତ୍ର ମାଧ୍ୟମ୤ ତେଣୁ ଇଂରାଜୀ ପ୍ରତି ବୁମୁଖ ନ ହୋଇ ଏହାକୁ ବ୍ୟବହାର କରି ଆମେ କିପରି ଆମ ଭାଷା ଓ ସାହିତ୍ୟକୁ ସୁଦୃଢ଼ କରିପାରିବ, ସେ ବିଷୟରେ ଚିନ୍ତା କରିବା ଜରୁରି ବୋଲି ଶ୍ରୀ ଦାସ କହିଥିଲେ୤ କାର୍ଯ୍ୟକ୍ରମରେ ସ୍ବାଗତ ଭାଷଣ ପ୍ରଦାନ କରି ‘ସମ୍ବାଦ’ର ସଂପାଦକ ସୌମ୍ୟରଂଜନ ପଟ୍ଟନାୟକ କହିଲେ, ୬୦ ବର୍ଷ ପରବର୍ତୀ ସମୟରେ ଜୀବନ ଆରମ୍ଭ କରୁଥିବା ବ୍ୟକ୍ତିମାନେ ହେଉଛନ୍ତି ରାଜ୍ୟର ପ୍ରକୃତ ସମ୍ପଦ୤ ସେମାନଙ୍କ ନିକଟରେ ଯଥେଷ୍ଟ ଅନୁଭବ ରହିଛି୤ ଯେଉଁମାନଙ୍କ ନିକଟରେ ସମୟ, ସମ୍ଭାବନା ଓ ଯଥେଷ୍ଟ ଅନୁଭବ ରହିଛି ରାଜ୍ୟର ବିକାଶ ଦିଗରେ ଏମାନଙ୍କୁ ବିନିଯୋଗ କରାଗଲେ ସୁଫଳ ମିଳିପାରିବ ବୋଲି ଶ୍ରୀ ପଟ୍ଟନାୟକ କହିଥିଲେ୤ ବର୍ତମାନ ରାଜରେ ଦେଖା ଦେଇଥିବା ନେତୃତ୍ବର ବିଲକ୍ଷଣକୁ ଏମାନେ ପୂରଣ କରିପାରିବେ ବୋଲି ସେ କହିଥିଲେ୤ ସେନା ପ୍ରସ୍ତୁତ କଲେ ଭାଷାର ସୁରକ୍ଷା ହୋଇପାରିବ ବୋଲି ଶ୍ରୀ ବେନହୁର କହିଥିଲେ୤ ଓଡ଼ିଆ ଭାଷା ଏବେ ଶାସ୍ତ୍ରୀୟ ମାନ୍ୟତା ପାଇଛି୤ ପ୍ରଥମ ବର୍ଷ ଓଡ଼ିଶାକୁ ମିଳିବାକୁ ଥିବା ୧୦୦ କୋଟି ଟଙ୍କାର ୨୫ଭାଗ ଶିଶୁ ସାହିତ୍ୟ, ୨୫ଭାଗ ବ୍ୟାକରଣ, ଲୋକକଥା ଓ ଢଗଢମାଳି ପ୍ରତି ୨୫ ଭାଗ ଓ ଅବଶିଷ୍ଟ ୨୫ ଭାଗ ଗବେଷଣାରେ ଲଗାଇଲେ ଓଡ଼ିଆ ଭାଷା ଉଜ୍ଜୀବିତ ହୋଇପାରିବ ବୋଲି ସେ କହିଥିଲେ୤ ଏହି ସମ୍ବର୍ଧନା ଉତ୍ସବରେ ‘ଆମ ଓଡ଼ିଶା’ର ପ୍ରକାଶନ ବିଭାଗର ମୁଖ୍ୟ ଅସିତ୍ ମହାନ୍ତି ଅତିଥି ପରିଚୟ ପ୍ରଦନା କରିଥିଲେ୤ ‘ଆମ ଓଡ଼ିଶା’ ସଂପାଦକ ସ୍ବରାଜ ମିଶ୍ର କାର୍ଯ୍ୟକ୍ରମ ପରିଚାଳନା କରିଥିଲେ୤ ଆଜିର ଉନ୍ମୋଚକ ଉତ୍ସବକୁ ନେଇ ଏକ ସ୍ବତନ୍ତ୍ର କାର୍ଯ୍ୟକ୍ରମ କନକ ଟିଭିରେ ଆସନ୍ତା ୪ ତାରିଖ ରାତି ୧୦ଟା ୩୦ର ପ୍ରସାରଣ କରାଯିବ୤
ସତ୍ବ ଅଧିକାର © ୨୦୧୬, ଆମ ଓଡ଼ିଶା   ଗୁରୁତ୍ବପୁର୍ଣ୍ଣ ୱବସାଇଟ୍   |   ଘୋଷଣାନାମା  |   ସର୍ତ୍ତାବଳୀ   |   ଲଗ୍‌ଇନ୍
ୱେବସାଇଟ୍ ପ୍ରସ୍ତୁତି ଓ ପରିଚାଳନା : ବାଟୋଇ ସିଷ୍ଟ୍ମସ୍ ପ୍ରାଇଭେଟ୍ ଲିମିଟେଡ୍   |