୨୮ ଅକ୍ଟୋବର ୨୦୧୭ ସୁଦ୍ଧା ମୋଟ ୧୦୫୨ ରକ୍ତଦାନ ଶିବିରରୁ ୫୦୮୭୮ ୟୁନିଟ୍ ରକ୍ତ ସଂଗୃହୀତ। ରକ୍ତଦାନ କ୍ଷେତ୍ରରେ ଆମ ଓଡ଼ିଶା ରାଜ୍ୟର ଅଗ୍ରଣୀ ସ୍ବେଚ୍ଛାସେବୀ ଅନୁଷ୍ଠାନ ଭାବେ ରାଜ୍ୟ ସରକାରଙ୍କ ଠାରୁ ଲଗାତାର ୧୧ ଥର ପୁରସ୍କୃତ। ସମସ୍ତ ରକ୍ତଦାତାଙ୍କୁ ଅଭିନନ୍ଦନ।

Back

   
‘ଆମ ଓଡ଼ିଶା’ ବକ୍ତୃତାମାଳାରେ ମନୋଜ ଦାସଙ୍କ ଉଦ୍ ବୋଧନ
‘ଶ୍ରୀଜଗନ୍ନାଥ ହେଉଛନ୍ତି ଆମ ଅପୂର୍ଣ୍ଣତାର ପ୍ରତିନିଧି: କିନ୍ତୁ ପୂର୍ଣ୍ଣତାର ପ୍ରତିଶ୍ରୁତି’୤ ‘ଶ୍ରୀଜଗନ୍ନାଥ କିମ୍ବଦନ୍ତୀ: ଏକ ଭବିଷ୍ୟତଧର୍ମୀ ପରମ୍ପରା’- ଶୀର୍ଷକ ବକ୍ତୃତା ଦେଇ ଓଡ଼ିଆ ସାରସ୍ବତ ଜଗତର ପ୍ରଥିତଯଶା ସାହିତ୍ୟିକ, ବାଗ୍ମୀ ମନୋଜ ଦାସ ଏହା କହିଛନ୍ତି୤ ‘ସମ୍ବାଦ’ ଓ ‘ଆମ ଓଡ଼ିଶା’ ପକ୍ଷରୁ ରବିବାର ସନ୍ଧ୍ୟାର ଏଠାରେ ଆୟୋଜିତ ‘ସ୍ବାଭିମାନ ଦିବସ ଓ ଆମ ଓଡ଼ିଶା ବକ୍ତୃତାମାଳା’ରେ ମୁଖ୍ୟ ଅତିଥି ଭାବେ ଯୋଗ ଦେଇ ଶ୍ରୀ ଦାସ କହିଲେ ଯେ ସଚେତନ ଅବା ଅବଚେତନ ଭାବେ ଆମ ଚିନ୍ତା, ଚେତନା ଓ କାର୍ଯ୍ୟକୁ ଯେଉଁ ଶକ୍ତି ପରିଚାଳିତ କରୁଛି, ତାହା ହେଉଛି ଜଗନ୍ନାଥ ସଂସ୍କୃତି୤ ପ୍ରତି ଜନ୍ମରେ ବିଧାତା ଆମକୁ ନିର୍ଦିଷ୍ଟ ପରିସରରେ କିଛି ଅଭିଜ୍ଞତା ସଞ୍ଚୟ କରିବାକୁ ସୁଯୋଗ ଦେଇଥାନ୍ତି୤ ସତର୍କ ଦୃଷ୍ଟିକୋଣ ସହିତ ଅଭିଜ୍ଞତା ଧରି ଆତ୍ମା ଆଗେଇ ଚାଲିଛି୤ ଅଜ୍ଞାନରୁ ଜ୍ଞାନ ଅଭିମୁଖେ ଯେଉଁ ଅଭିଯାତ୍ରା ଆରମ୍ଭ ହୋଇଛି, ସେଥିରେ ମିଳୁଥିବା ଉପଲବ୍ ଧି ଆମକୁ ସଚେତନ କରିଥାଏ୤ ଏ ପରିପ୍ରେକ୍ଷୀରେ ‘ସ୍ବଧର୍ମ’ ଏକ ବ୍ୟକ୍ତିଗତ ପ୍ରଗତିର ବିନ୍ଦୁ୤ ଯେଉଁ ବିନ୍ଦୁରେ ପହଞ୍ଚିଲେ ଆମେ ସଚେତନ ହେଉ୤ ତେଣୁ ଶ୍ରୀଜଗନ୍ନାଥ ସଂସ୍କୃତି ଆମକୁ ‘ସ୍ବଧର୍ମ’ ସମ୍ପର୍କରେ ସଚେତନ କରେ ବୋଲି ଶ୍ରୀ ଦାସ କହିଥିଲେ୤ ‘ସମ୍ବାଦ’ର ସମ୍ପାଦକ ସୌମ୍ୟରଂଜନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଉତ୍ସବରେ ଶ୍ରୀ ଦାସ କହିଲେ ଯେ, ଦେଶର ପ୍ରାଚୀନ ଚାରି ଧାମ ମଧ୍ୟରୁ ପୁରୀ ହେଉଛି ଅନ୍ୟତମ୤ ଏଠାରେ ପୂଜା ପାଉଥିବା ଦିଅଁ ଗୋଷ୍ଠୀବାଦଠାରୁ ଉର୍ଧ୍ବରେ୤ ସେ ବୌଦ୍ଧ ହୁଅନ୍ତୁ, ଜୈନ ହୁଅନ୍ତୁ, ଅଥବା ଶୂନ୍ୟବାଦୀ, ସମସ୍ତେ ଦବି କରନ୍ତି ଶ୍ରୀଜଗନ୍ନାଥ ଆମର୤ ଅଥଚ ଏହାକୁ ନେଇ କେବେ ସଂଘର୍ଷ ହୋଇ ନାହିଁ୤ ଶଙ୍କରାଚାର୍ଯ୍ୟ ଶ୍ରୀଜଗନ୍ନାଥଙ୍କ ଚକାଆଖିରେ କଟାକ୍ଷ ଦେଖିଛନ୍ତି୤ ତୁଳସୀ ଦାସ ରାମ ଭାବେ ତାଙ୍କୁ ଦେଖିଛନ୍ତି୤ କହିବା ବାହୂଲ୍ୟ, ପ୍ରତ୍ୟେକ ବକ୍ତିର ନିଜସ୍ବ ଅନୁଭୂତି, ଶ୍ରଦ୍ଧା, ଶକ୍ତି ଯେଉଁ ପର୍ଯ୍ୟାୟରେ ରହିଛି, ଶ୍ରୀଜଗନ୍ନାଥ ତାଙ୍କୁ ଠିକ୍ ସେମିତି ମିଳିଛନ୍ତି୤ ଶ୍ରୀ ଦାସ କହିଥିଲେ ଯେ ଆନୁଷ୍ଠାନିକ ଧର୍ମର ବିଲୁପ୍ତି ନିଶ୍ଚିତ୤ ତେଣୁ ଭବିଷ୍ୟତରେ ଭଗବାନ-ଭକ୍ତର ସମ୍ପର୍କ ବ୍ୟକ୍ତିଗତ ପର୍ଯ୍ୟାୟରେ ରହିବ୤ ଏ ପରିପ୍ରେକ୍ଷୀରେ ଶ୍ରୀଜଗନ୍ନାଥ ଆନୁଷ୍ଠାନିକ ଧର୍ମରୁ ଭିନ୍ନ୤ ମଣିଷ-ବ୍ରହ୍ମ ଏକ, ବ୍ରହ୍ମ ମଣିଷଠାରୁ ଅଭିନ୍ନ୤ ମାତ୍ର ଦୁର୍ଭାଗ୍ୟ, ଆମେ ଏହାକୁ ଅନୁଭବ କରିପାରନ୍ତି ନାହିଁ୤ ଇନ୍ଦ୍ରଦ୍ୟୁମ୍ନ, ବିଶ୍ବାବସୁ, ବିଦ୍ୟାପତି, ଲଳିତା କିମ୍ବଦନ୍ତୀର ବିଭିନ୍ନ ଉଦାହରଣ ଦେଇ ଶ୍ରୀ ଦାସ କହିଲେ ଯେ ଦାରୁ ପ୍ରଥମ ଚେତନା, ବିବର୍ତନରେ ଗୋଟିଏ ଯୁଗର ସୂତ୍ରପାତ୤ ଆମ ଦିଅଁ (ଶ୍ରୀଜଗନ୍ନାଥ) ଅପୂର୍ଣ୍ଣ, ତେଣୁ ମାନବ ଜାତି ଅପୂର୍ଣ୍ଣ୤ କିନ୍ତୁ ଗୁରୁତ୍ବପୂର୍ଣ୍ଣ ହେଉଛି, ଶ୍ରୀଜଗନ୍ନାଥ କିମ୍ବଦନ୍ତୀ ଭବିଷ୍ୟଧର୍ମୀ୤ ଏହାର ପ୍ରମାଣ ହେଉଛି ଦଶାବତାର୤ ଶ୍ରୀ ଜଗନ୍ନାଥ କଳ୍ କୀ ଅବତାରରେ ମ୍ଳେଚ୍ଛ ସଂହାର କରିବ ନାହିଁ୤ ମ୍ଳେଚ୍ଛତ୍ବ ସଂହାର କରିବେ୤ ମଣିଷ ଚେତନାରୁ ଅବିଶ୍ବାସ ଦୂର ହେବ୤ ଏକତା, ମୁକ୍ତି, ଜ୍ଞାନ, ଶକ୍ତି, ଭକ୍ତି, କର୍ମ ସମନ୍ବୟରେ ଚେତନାର ବିଶ୍ବ ରାଜପଥରେ ଶ୍ରୀଜଗନ୍ନାଥଙ୍କ ରଥ ଗଡ଼ିଚାଲିବ୤ ଏହା ହିଁ ଭବିଷ୍ୟଧର୍ମୀ କିମ୍ବଦନ୍ତୀ୤ ଶ୍ରୀଜଗନ୍ନାଥ ଆମ ସହିତ ଅଛନ୍ତି୤ ଅପେକ୍ଷା କରିଛନ୍ତି ମଣିଷ କେବେ ଅବିଶ୍ବାସରୁ ମୁକ୍ତ ହେବ୤ ସାମୂହିକ ଭାବେ ନ ହେଲେ ମଧ୍ୟ ବ୍ୟକ୍ତିଗତ ସ୍ତରରେ ଅନ୍ତତଃ ଏ ଦିଗରେ ଚେଷ୍ଟା ହେବା ଉଚିତ ବୋଲି ଶ୍ରୀ ଦାସ କହିଥିଲେ୤ ଏହି ଅବସରରେ ଶ୍ରୀ ଦାସ କହିଥିଲେ ଯେ ଜଣେ ବିରଳ ପ୍ରତିଭା ଯାହାଙ୍କ ରଚନା ପାଶ୍ଚାତ୍ୟ ସାହିତ୍ୟ ହେଉ ଅଥବା ଆରବିଆନ୍ ନାଇଟ୍ସ, ସମସ୍ତଙ୍କୁ ପ୍ରଭାବିତ କରିଛି, ସେ ହେଉଛନ୍ତି ପଞ୍ଚତନ୍ତ୍ରର ଲେଖକ ପଣ୍ଡିତ ବିଷ୍ଣୁ ଶର୍ମା୤ ଆଉ ସେ ହେଉଛନ୍ତି ଓଡ଼ିଶାର ସନ୍ତାନ୤ ଯଦିଓ ଏହା ଉପରେ ଯଥେଷ୍ଟ ଗବେଷଣା ହେବା ଉଚିତ୤ ପରେ ଶ୍ରୀ ଦାସ ଦର୍ଶକମାନଙ୍କ ବିଭିନ୍ନ ପ୍ରଶ୍ନର ଉତ୍ତର ଦେଇଥିଲେ୤ ସଭାପତୀୟ ଅଭିଭାଷଣ ଦେଇ ଶ୍ରୀ ପଟ୍ଟନାୟକ କହିଲେ ଯେ ମଧୁବାବୁଙ୍କ ଜୟନ୍ତୀକୁ ‘ଆମ ଓଡ଼ିଶା’ ପକ୍ଷରୁ ସ୍ବାଭିମାନ ଦିବସ ଭାବେ ପାଳନ କରାଯାଉଛି୤ ‘ଆମ ଓଡ଼ିଶା’ର ଏହି ଉଦ୍ୟମକୁ ରାଜ୍ୟର ବହୁ ଅନୁଷ୍ଠାନ ଗ୍ରହଣ କରି ଆଜିର ଦିବସକୁ ସ୍ବାଭିମାନ ଦିବସ ଭାବେ ପାଳନ କରିବା ଆରମ୍ଭ କରିଛନ୍ତି୤ ଆମକୁ ମନେ ରଖିବାକୁ ହେବ ଯେ ଆମ ଭିତରେ ଏପରି ପ୍ରତିଭା ଅଛନ୍ତି, ଯେଉଁମାନେ କି ସାରା ଭାରତକୁ ନେତୃତ୍ବ ଦେଇପାରିବେ୤ ମଧୁସୂଦନଙ୍କ ସଂଘର୍ଷର କାହାଣୀ ଯଦି ଆମ ଯୁବ ପିଢ଼ିଙ୍କୁ ଅନୁପ୍ରାଣିତ କରିପାରୁଛି, ଆମକୁ ମନେ ରଖିବାକୁ ହେବ ଯେ, ଏ ଜାତି ଏତେ ତଳକୁ ଯାଇନାହିଁ, ଯେପରି ଭାବେ ଚିତ୍ରଣ କରାଯାଉଛି୤ ତେବେ ଆମେ କେବଳ ରାଜନୀତି, ରାଜନୈତିକ ବ୍ୟକ୍ତି ଓ ବ୍ୟବସ୍ଥା ଉପରେ ଦୋଷ ଲଦି ଦେଲେ ହେବ ନାହିଁ୤ ଆମକୁ ଏଥିରେ ସଂଶ୍ଳିଷ୍ଟ ହେବାକୁ ପଡ଼ିବ ଓ ବିକାଶର ଧାରାକୁ ଆଗେଇ ନେବାକୁ ପଡ଼ିବ ବୋଲି ଶ୍ରୀ ପଟ୍ଟନାୟକ ଆହ୍ବାନ ଦେଇଥିଲେ୤ ଆରମ୍ଭରେ ‘ଆମ ଓଡ଼ିଶା’ର ସଚିବ ସ୍ବରାଜ ମିଶ୍ର ଅତିଥି ପରିଚୟ ପ୍ରଦାନ କରିଥିବା ବେଳେ ଶେଷରେ ‘ଆମ ଓଡ଼ିଶା’ ପ୍ରକାଶନ ବିଭାଗର ସମ୍ପାଦକ ଅସିତ ମହାନ୍ତି ଧନ୍ୟବାଦ ଅର୍ପଣ କରିଥିଲେ୤ ଏହି ଅବସରରଆ ଡ. ବିମଳେନ୍ଦୁ ମହାନ୍ତିଙ୍କ ଦ୍ବାରା ରଚିତ ଓ ଆମ ଓଡ଼ିଶା ଦ୍ବାରା ପ୍ରକାଶିତ ପୁସ୍ତକ ‘ଆମ ସୁଭାଷ’କୁ ଶ୍ରୀ ଦାସ ଉନ୍ମୋଚନ କରିଥିଲେ୤ ସେହିପରି ବିଦ୍ୟାପୁରୀ ପ୍ରକାଶନୀ ଦ୍ବାରା ପ୍ରକାଶିତ, ଡ. ବିଜୟାନନ୍ଦ ସିଂହ ଓ ଡ. ସୁନୀଲ ପୃଷ୍ଟିଙ୍କ ଦ୍ବାରା ସଂକଳିତ ପୁସ୍ତକ ‘ମନୋଜ୍ଞ ମନୋଜ ଗଳ୍ପମାଳା’ ପୁସ୍ତକକୁ ଶ୍ରୀ ପଟ୍ଟନାୟକ ଉନ୍ମୋଚନ କରିଥିଲେ୤ ଏହି ଅବସରରେ ଶ୍ରୀ ପଟ୍ଟନାୟକ ମୁଖ୍ୟ ଅତିଥି ଶ୍ରୀ ଦାସଙ୍କୁ ଉପଢୌକନ ଦେଇ ସମ୍ବର୍ଧିତ କରିଥିଲେ୤ ରାଜ୍ୟର ବହୁ ବିଶିଷ୍ଟ ସାହିତ୍ୟିକ ଓ ବୁଦ୍ଧିଜୀବୀ ‘ଆମ ଓଡ଼ିଶା’ କାର୍ଯ୍ୟାଳୟ ପରିସରରେ ଆୟାଜିତ ଏହି ସାରସ୍ବତ ସମାବେଶରେ ସାମିଲ୍ ହୋଇଥିଲେ୤
ସତ୍ବ ଅଧିକାର © ୨୦୧୬, ଆମ ଓଡ଼ିଶା   ଗୁରୁତ୍ବପୁର୍ଣ୍ଣ ୱବସାଇଟ୍   |   ଘୋଷଣାନାମା  |   ସର୍ତ୍ତାବଳୀ   |   ଲଗ୍‌ଇନ୍
ୱେବସାଇଟ୍ ପ୍ରସ୍ତୁତି ଓ ପରିଚାଳନା : ବାଟୋଇ ସିଷ୍ଟ୍ମସ୍ ପ୍ରାଇଭେଟ୍ ଲିମିଟେଡ୍   |